Под влијание на висок воздушен притисок (Антициклон) и на стабилна  и сува воздушна маса, до крајот на оваа недела времето во Македонија ќе се задржи стабилно, суво и сончево, повремено со мала до умерена локална облачност. Ќе биде претежно тивко, а во утринските часови по котлините  и по речните долини ќе има појава на магла  и на ниска облачност.

Во Скопје и околината исто така, до крајот на оваа недела времето ќе биде стабилно, суво и сончево, со мала локална облачност. Ќе биде претежно тивко, а во утринските часови ќе има појава на магла или на ниска облачност.

Што се однесува до температурите, наутро останува студено, со минимални температури, кои понекаде, особено во Беровскиот регион, како и на високите места  и на планините ќе се спуштаат за некој степен под нулата, а на повеќето места тие ќе се спуштаат до околу, или под 5 степени.

Максималните дневни температури, до четврток ќе бидат малку повисоки и ќе се искачуваат во интервалот од 18 до 25 степени, додека потоа ќе бележат тенденција на пад за неколку степени и ќе се искачуваат во интервалот од 15 до 23 степени. Во Скопје  температурата наутро ќе се спушта во интервалот помеѓу 5  и 7 степени, додека максималната температура ќе се искачува во интервалот помеѓу 21  и 23 степени.