Западните и југозападните предели од Македонија зафатени од силно невреме и громови!

Како што и најавивме, западната половина од државава е под влијание на циклонска активност и на изразена влажна и нестабилна воздушна маса од запад. Токму во овие предели има врнежи од дожд и појава на грмежи.

Локално процесите се интензивни и застапени во форма на невреме, проследено со интензивен пороен дожд, силен ветер, силни и чести електрични празнења и со појава на град.

Невремето ќе продолжи и во следните часови, со што препорачуваме крајна внимателност, односно во случај на појава на силно невреме и на силни електрични празнења да не се претстојува на отворен простор, како и под осамени дрвја.

Во следните денови пак се очекува стабилизација на времето, а ќе има и сончеви периоди.

Наутро ќе биде релативно свежо со минимални температури на воздухот кој ќе се спуштаат во интервалот од 9 до 16 степени, а преку ден ќе биде пријатно топло со максимални дневни температури на воздухот кој ќе се искачуваат во интервалот од 22 до 29 степени.

Значи и покрај ова невреме, мини лето ќе имаме во следниот период.

 

 

• За нови, детални и по потреба обновени метео информации, следете го официјалниот фејсбук профил на Славчо Попоски тука!
• Можете да ме следете и на инстаграм slavchopoposki!